كتبت الزميلة في قناة الجديد الإعلامية جويل الحاج موسى عبر صفحتها الخاصة على موقع فيسبوك اللحظات الأخيرة للشاب أنطوني بلعة الذي توفي ليل 24 آذار إثر حادث سير مروع على أوتوستراد جل الديب حيث صودف مرورها بالقرب من الحادث وجاء في منشورها:
“قبل تاريخ ٢٤ آذار ٢٠٢٠ ما كنت بعرف حدا اسمو انطوني بلعا.
شاء القدر انو كون مارقة ع نفس الطريق اللي هو مارق عليها، وشوف الحادث لحظة اللي صار.
ما فكرت مرتين صفيت ونزلت. طلبت الصليب الأحمر انا وعم جرب ضل احكي ليضل واعي.
ما قدرت قلو غير “ما تخاف، منك وحدك، وجايي الصليب الأحمر يساعدك”.
بلحظتا من قلبي صليت… (اوف قديش الي ما حكيت مع الله بهالحرارة) من قلبي صليت يضل عم يتنفس!! بس اللي طلبتو ما صار. محاولة إنعاش جسم انطوني ما نفعت، جسمو اللي كنت عم شوفو عم يتنفس فجأة بطّل في نبض.
وأضافت: “خفت وبكيت كتير، اول مرة بشوف شو يعني “قتيل في حادث سير”! كان الخبر، يقطع مرور الكرام، بس اول مرة هالخبر بشوفو عم يصير. اول مرة بعيش رهبة الصراع بين الحياة والموت لحظة بلحظة”
وختمت: “انطوني راح ع غير مطرح، وانا فهمت هلق انو كنت موجودة بهاللحظة حتى يبرد قلب اهلو شوي وقت يعرفو انو انطوني ما كان وحدو، وانو يمكن آخر كلمة سمعها هي “يا رب”.
رجاء اذكرو انطوني بصلاتكن، وبترجاكن ما تسرعو بالسيارة.
وأرفقت موسى منشورها بصورة لسيارة أنطوني وصورة له.
