أطلّ الممثل باسم مغنية في فيديو عبر حساباته على مواقع التواصل الإجتماعي، وقال: “إسمي باسم مغنية وصرلي أكتر من 20 سنة بمثّل، طبعاً مرقت بنجاحات وإخفاقات كتيرة وكتير بحب المهنة اللي انا عم بشتغل فيها، بعشق التمثيل ونحنا هلق بوضع اقتصادي كتير صعب، لبنان عم بينازع والبعض عم بيطالب انو الناس تهاجر من هيدي البلد”.
وتابع باسم مغنية رسالته المصوّرة داعياً الشعب اللبناني إلى مقاومة الظروف الصعبة رفضاً للهجرة، قائلاً: “أنا بعد كلّ شي عم بيصير، أنا أخدت قرار انّي أكيد ما هاجر، مش رح اترك البلد لهالناس اللي سرقونا، ولا بدعي اي حدا انو يهاجر. هلق بعرف يمكن ما عندي اولاد، لمّا بيصير عندي ولد يمكن بتصير وجهة نظري مختلفة، بس أنا بدعي كلّ واحد عنجد يقاوم ويبقى بهيدي البلد”.
بدورها، علّقت الممثلة ورد الخال على فيديو باسم مغنية بالقول: ” شو حلو اللي قلتو بس كمان طلبك صعب. كلنا عم ننازع، ونحنا فنانين مهنتنا وضعها بيخوف بهالظروف. قولك ما فينا نمثّل برّا؟”.
وردّ مغنية على تعليق الخال بعبارة “حتى لو فينا، مش لازم نستسلم عند أول مفرق”، فأجابته: “اي مفرق؟ احترق سلّافنا من المفارق… للأسف وين وصلونا هالفاسدين الله لا يوقفن”.
LBCI
