كتب الزميل روي جبرايل على حسابه على فايسبوك:”
أوّل ما حكيوني من وزارة الصّحّة وخبّروني إنّو نتيجة test الCOVID19 إيجابيّة، خفت. مش من الكورونا، بس من النّقلة لمستشفى رفيق الحريري الجامعي، “بأسرع وقت ولمدّة غير محدّدة”. أنا اليوم صار إلي 7 أيّام بالمستشفى، والحمدلله وضعي الصّحّي أحسن بكتير.
عم بكتب تقول إنّو طبيعي كتير تخافوا من الtest، وطبيعي أكتر تخافوا من المستشفى. بس خبرتي بهالكم يوم بتلزمني شاركّن بالآتي:
أوّلًا، الtest بياخد أقلّ من دقيقة. في نطرة طويلة شوي قبل ما يصير دوركن، بس الtest كتير سهل وسريع. وأهمّ من هيك، الممرّضات والأطبّاء بقسم “طوارئ الكورونا” رائعين. رائعين.
ثانيًا، النّتيجة بتطلع بعد يوم أو يومين. إذا كانت النّتيجة سلبيّة، ما بيتّصلوا فيكن. إذا كانت إيجابيّة، بيتّصلوا فيكن وبيساعدوكن تفهموا كلّ الإجراءات اللّي لازم تاخدوها وبيجاوبوا على كلّ أسئلتكن، المنطقيّة وغير المنطقيّة.
ثالثًا، المستشفى ما إلو علاقة بالصّورة اللّي براسنا. الصّورة القاتمة والمليانة موت. المستشفى مليان إنتباه ومرافقة دافية من موظّفي قسم التّنظيف، الممرّضين، الأطبّاء… طريقة التّعامل معي كانت أكبر مفاجأة لإلي هون بالمستشفى، وخلّت إقامتي سلسة كتير.
طبيعي تخافوا. لأنّو الخوف وين ما كان. ولازم يكون وين ما كان، تنتصرّف بمسؤوليّة ونتجنّب كارثة بعد ما عشنا متلها. بس ما تخافوا تحكوا طبيبكن أو وزارة الصّحّة إذا بيّنت عليكن العوارض. ما تخافوا تعملوا الtest. وإذا كانت النّتيجة إيجابيّة، ما تخافوا تلتزموا بتوصيات الإختصاصيين ويمكن تتوجّهوا للمستشفى اللّي بيقترحو عليكن.
الوضع دقيق كتير. بس بخطوات كتير بسيطة، فينا نتجنّب الكارثة ونحمي اللّي منحبّن. ومن هلّق لوقتها، خلّيكن بالبيت وكونوا مبدعين.”
من موقعنا نتمنى الشفاء لروي ولكل المصابين .
