جان زغيب/جديدنا
مكتوب علينا البكي والاحزان … كل ما مات أيا جزء منّا. وبتبقى الذكريات والحكايات ومنتمنى اللي راح يرجع ل عنّا ..
يا ايلي طفلك شو بدنا نقلّو ؟
هيك الاوادم ع غفلة بيفلّو؟
يمكن نقلو مشيئة الرب ويقلنا شو صار لو ضلّو…
بكرا الايام بدا تعجنو ..ونحنا منعرف معجنو.. حامل أمانة وإرث ومستقبل حياة .. من بي كان حامل تعب وهموم وسهر… وانشالله بينصفو القدر .. وتحميه من مطرح ما انت… مطرح ما بقلبو سكنت…ورح تبقى.
وزوجتك مين بدا تنطر بعد.. من بعد ما يحرقها البُعد.. طلطل عليها من فوق لما تصلّي.. بركي بتغرف حنية ل قلب ما شبع.. من ريحة تيابك..يا تارك حبابك… خليها بالحلم تشوفك وتبوّس كفوفك… وتترضى عليها مع ابنك الحبيب.
واهلك مش عارفين شو صار… اذا كان بعدو حلم او واقع… ناطرين يوعو من ليل عمرو نهار…ناطرين يرجع كل شي متل ما كان.. مش مصدقين انك جايي بالنعش يا عريس… وصوت الزفة يللي كان بيوم فرحتك يرقّصك ع كتاف عم تبكي وجرس يقول: اخ يا الله.
مش مستنظرين يلي ربوه سنين وكبر قدام عيونن.. يروح ..قبلن و من دونن ! رشّو رضاهن من زمان كتير وهلق صار وقت ترشّ عليهن .. رضاهن.
هيك الاوادم بيروحو.. وربنا بيرحم روحو.. انت ع يمينو فوق فوق .. وناطرين بنهار القيامة تقوم ونفرح فرحة العدرا بفراغ القبر…
الله معك ايلي مطر… سلّم عللي سبقونا وعلمونا
انو كل شي بالدني باقي بهالدني
انو الدني مرقة والعمر سرقة…
والفرح الاكبر فوق…فوق…
بقلم المؤسس رئيس التحرير جان جورج زغيب
Facebook: jean mokhtar zgheib
Twitter : @jeanzgheib1
